Sumber: Mailing List Batak Gaul-Yahoogroups

RUHUT-RUHUT PARADATON

A. PARJOJOR NI ANGKA ULAON DI PARBAGASON NI ANAK / BORU
Parjojor ni ulaon Parbagason ni Anak dohot Boru tarsongon na di toru on ma dohot Pardalanni angka ulaon :

1. Mangarisik-risik
Masijaloan/masioloan hata anak dohot boru, naeng mamungka pardongan saripeon, jala dipasahat tu natorasna be, di sangkap ni nasidai, jala ginoar ma nasida “MAROROAN”.

2. Paranak dohot parboru marsuru utusanna be (somalna sian boru) tu huta ni parboru laho mangarangrangi ulaon adat. Utusan ni paranak dohot utusan ni parboru di goari mai DOMU-DOMU. Mangakatai ma angka dongan domu-domu on taringot tu sinamot dohot angka namardomu tu ulaon I, domu-domu ma napatolhashon hasil ni pangkataion ni nasida tu paranak dohot parboru di rumang ni siulaon namangihut.

3. Borhat ma paranak dohot rombonganna di ari naung ditontuhon tu huta ni parboru (marhusip/manang marhata sinamot) dohot sude siulaon namardomu tu parbogasan ni anak dohot boru. Dihatai ma disi :
a. Rumang ni ulaon, dialap jual (ulaon di huta ni parboru) manag ditaruhhon jual (ulaon dihuta ni paranak).
b. Godang ni sinamot.
c. Godang ni ulos herbang.

Dung adong kesepakatan pangkataion, diuduti ma dohot ulaon :
a. Martumpol
b. Matonggo raja dohot mariaraja
c. Manjou dohot manggokhon angka tutur
d. Pesta marunjuk
e. Ulaon sadari; maningkir tangga dohot paulak une.

B. PATUAHON PANGKATAION DOHOT MARHUSIP

Dijabu ni parboru dipatupa ulaon na patuahon paghataion dohot marhusip. Paranak rap dohot angka dongan tubuna dohot boruna borhat tu huta ni parboru. Parboru dohot dongan tubuna, boruna dohot dongan sahuta manjangkon haroroni paranak.

Paranak pasahathon boan-boan nasida tu parboru ima sipanganon indahan na las dohot juhut pinahan lobu lengkap dohot namargoar tudu-tudu ni sipanganon. Parboru pasahat dengke si simudur-udur tu paranak.

Tangiang laho marsipanganon sian paranak, sidung marsipanganon parboru manungkun taringot tu tudu-tudu ni sipanganon binoan ni paranak. Jala dialusi parhata sian paranak ma,
“Mauliate ma rajanami di sungkun-sungkun muna i. Ia tudu-tudu ni sipanganon nahupasahat hami tu rajai, surung-surung muna doi raja nami (parboru).”

Ndang marbagi jambar di tingki I, alai dung selesai sude pangkataion paranak mulak tu hutana, parboru mambagi tudu-tudu ni sipanganon I tu dongan tubuna, boru dohot dongan sahuta. Di tingki laho mulak paranak, parboru pasahat jual ni paranak marisi boras dohot dengke.

C. MASISISEAN
Raja parhata ni parboru manungkun sangkap haroroni paranak, jala dialusi raja parhatani paranak sungkun2 ni parboru, ima na laho patuahon angka pangkataion, ala naung masiunduhan hata/masihaholongan angka naposo (anak dohot boru).

Raja parhata ni parboru marsuru sian boru ni nasida laho patangkashon tu nanaeng si boru muli manang naung tutu alu-alu ni anak pangaririti tu natorasna, molo dung dipaboa naung tutu, jala tingkos naung masiunduhan hata nasida laho mardongan saripe jala masihaholongan, digabehon parboru ma na patuahon pangkataioni.

Noot : Raja parhata ima namanguluhon pangkataion di sada ulaon sian namamulai sahat tu namangujungi. Paidua ni hasuhuton do nagabe raja parhata.

Dung selesai na patua hata, diudutima dohot na mangarangrangi siulaon namangihut dodok ma I marhusip. Di tingki namarhusip ma dirangrangi rumang ni siulaon ima :
1. Ise namanghasuhuthon ulaon I, paranak manangparboru.
Molo parboru do namanghasuhuthon ulaon, didokmai dialap jual.
Molo paranak do namanghasuhuthon didokma I ditaruhon jual.
2. Godang ni sinamot.
3. Suhi ni ampang na opat ni parboru, todoan dohot panandaion, sileanon ni paranak doi tangkas.
4. Godang ni ulos herbang.
5. Pinggan Panganan tu parboru, suang songoni ulos tinonun sadari tu paranak, dihatai mai asa sinangkohi tanggaa ni balatuk nabe (masipatupa tu horong na be).
6. Martumpol : dituntuhon hari/tanggal, tingki, inganan.
7. Pamasu-masuon : ditontuhon hari/tanggal, tingki, inganan dohot tempat.
8. Marsibuha-buhai.
9. Godang ni undangan.
10. Olop-olop (hepeng) : Sian paranak dohot parboru.
11. Ulaon sadari : Maningkir tangga dohot paulak une.
12. Marhata si gabe-gabe : Parboru.
13. Mangampu : Paranak.

Dung rimpun sude rumang ni ulaoni dihatai, ditutup ma dohot tangiang, andorang so ditutup, dijou ma calon panganten asa rap martangiang. Dung selesai martangiang, calon penganten manjalang situan natorop.

D. MARTUMPOL
Ditingki na marhusip nunga ditontuhon ari partumpolon (arina, tingki, tempat dohot gereja ).
Di ari partumpoloni, pihak paranak dohot pihak parboru dohot sude naniontang ni na dua hasuhuton borhat tu gareja mangadopi ulaon partumpoloni.

Paranak dohot anak mangoli borhat tu huta ni parboru asa rap nasida tu gereja. Dung dapot waktu partumpolon dimulai ma acara partumpolon na niuluhon ni pandita/guru huria manang sintua.

Dung selesai acara partumpoloni, parhalado ni huria mangalehon kesempatan tu paranak dohot parboru mandok hata huhuasi :
1. Mandok mauliate tu pandita/guru huria manang sintua dohot tu sude tondong namangadopi ulaon partumpoloni.
2. Mangido asa rap udur tu jabu ni hasuhuton, laho ulaon tonggo raja manang ria raja.

Dung sidung mandok hata huhuasi, parhalado ni huria mangalehon kesempatan tu na hadir mangadopi partumpoloni, laho manjalang calon penganten berdua. Selesai marsijalangan, marpungu ma diaula Gereja naung ni tontuhon ni parboru, laho mangan lampet minum kopi.

E. MARHARA SINAMOT
Dihuta ni parboru do ulaon na marhata sinamot. Diulaon marhata sinamot nungnga marpungu disi na ni undang ni paranak dohot parboru ima; dongan tubu, boru, bere/ibebere, dongan sahuta pariban, ale-ale songoni nang hula-hula dohot tulang.

Dung renta hundul sude na niundangi, manungkun ma rajani parhata ni parboru tu raja ni paranak manang naung rade nasida, acara di mulai. Raja parhata ni paranak mangalusi, nungnga mangarade hami rajanami, nungnga boi tamulai.

F. URUTAN NI SIULAON
1. Paranak pasahat tudu-tudu ni sipanganon tu parboru, huhut dihatahon hata ni tudu-tudu ni sipanganon. Parboru pasahat dengke simudur-mudur tu paranak, huhut dihatahon.
2. Tangiang marsipanganon sian paranak.
Dung sidung martangiang marsipanganon, paranaK mangkatahon huhuasi ni sipanganon :
Sititi ma si hompa golang-golang pangarahutna
Otik so sadia sipanganon nahupatupa hami
Sai godang ma pinasuna (marjomuk ma hita).
3. Ditingki mangan, paranak pasahat sulang-sulang tu parboru, huhut dihataon :
Husulang ma rajai, manumpak ma tondina, manuai ma sahalana, tu gabena ma hami ianakkonna.
4. Suhut paranak dohot suhut parboru mandapothon sude naniontangna huhut dihatahon :
Butong hamu amang, inang.
5. Paranak dohot parboru mambagi jambar juhut i tu ganup horong ni nasida be, dung dibagi 2 (dua) tudu-tudu ni sipanganoni (asing ni ihur-ihur himpal doi tu parboru, ima ulakni tandok).

About these ads
Comments
  1. romulus pohan says:

    ok

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s